ҚР Сыбайлас жемқорлыққа қарсы іс-қимыл агенттігінің төрағасы Алик Шпекбаев «Ақтөбе» әлеуметтік-кәсіпкерлік корпорациясы» АҚ-ы кеңсесінде болды

2020-жылдың 20-қарашасында ҚР Сыбайлас жемқорлыққа қарсы іс-қимыл агенттігінің төрағасы Алик Шпекбаев пен  облыс әкімі Оңдасын Оразалин «Ақтөбе» әлеуметтік-кәсіпкерлік корпорациясы» АҚ-ның кеңсесінде болды. Меймандар инвесторлар мен кәсіпкерлерге толық консалтингтік қызмет көрсететін фронт-кеңсенің қызметімен танысты.

«Ақтөбе» ӘКК» АҚ-ы инвестиция тарту жөніндегі өңірлік оператор ретінде анықталғаны белгілі. Ақтөбе облысы әкімдігінің қолдауымен «Aqtobe HUB» өңірлік даму орталығы құрылды. Қазір оның тұжырымдамасын анықтау, өңірдің инвестициялық әлеуеті мен инвестиция тарту жөнінен қандай елдермен байланыс орнатылатынын анықтау міндеті тұр. Бүгінгі таңда «Ақтөбе» ӘКК-сының  жобалар портфелінде жалпы құны 178,6 млрд теңгенің 75 жобасы  бар.

«Ақтөбе» ӘКК» АҚ басқарма төрағасы Ермек Имантаев корпорация қызметімен таныстырып, дамудың жаңа моделі жөнінде айтып берді. Мәселен, Ақтөбе өңірінің трансформациясы аясында «Ақтөбе» әлеуметтік-кәсіпкерлік корпорациясы базасында жобалық басқару жүйесі енгізілді. Бұл жобаларды басқару процесіне қатысушылардың бәріне – жобаға жетекшілік ететін менеджерге, жобаның аяқталуын күтіп отырған клиентке, сонымен бірге, жобаның жүзеге асырылуына үлесін қосқан командаға ыңғайлы жүйе. Жобаларды басқару процесінің өзі бірнеше кезеңнен құралған. Бұл – процестің тиімділігі мен ашықтығын қамтамасыз етеді, әрі жұмыс нәтижесін аз уақыттың ішінде көруге мүмкіндік береді.

Бұдан кейін, «Aqtobe HUB» өңірлік даму орталығы» корпоративтік қорының директоры Әнуар Нұртазин басқару жобасына негізделген мемлекеттік жоспарлау жүйесін таныстырды. «Ақтөбе» ӘКК базасындағы жобалық кеңсе 2020-жылдың 25-мамырында ашылған болатын. Жобалық кеңсе бес негізгі бағыт бойынша жұмыс істейді, оның нәтижесі бойынша Ақтөбе облысы республикада көшбасшы орында. Жобалық басқару аясында бірыңғай сандық басқару жүйесі енгізілген. 2021 жылдың соңына қарай өңірдегі жобалардың 80%-ы онлайн-ортада жүзеге асырылады деген жоспар бар.