Шағын және орта бизнеске 160 млрд теңге жеңілдетілген несие берілді

Несие алғандардың қатарында көтерме және бөлшек сауда, өңдеуші өнеркәсіп және құрылыс саласы өкілдері көп. Бұл туралы kapital.kz хабарлайды.

Қазақстан тұрақтылық қорынан хабарланғандай, шағын және орта бизнесті несиелендіру бағдарламасы бойынша кәсіпкерлерге жылдық 8 пайыз үстемемен 12 айға дейін несие ұсынылады.

Бүгінге дейін екінші деңгейлі банктер арқылы 1 мың 116 кәсіпкерге жалпы сомасы 160 млрд теңге несие берілген. Жеңілдетілген несие бағдарламасы мемлекет басшысы Қасым-Жомарт Тоқаевтың бастамасымен қолға алынды. Елде төтенше жағдайдың енгізілуі салдарынан табысынан айырылған шағын және орта бизнес субъектілерін, жеке кәсіпкерлерді қолдау үшін Ұлттық банктен 600 млрд теңге бөлінді. Бағдарлама Қазақстан тұрақтылық қоры, қаржы нарығын реттеу және дамыту агенттігі мен елдің 12 банкі арқылы жүзеге асырылып жатыр.