«Ақтөбе» ӘКК-ы «Мейірімді жексенбі» акциясын бастады

«Ақтөбе» әлеуметтік-кәсіпкерлік корпорациясы «Мейірімді жексенбі» қайырымдылық акциясын жариялады. Шара еріктілер жылы аясында ұйымдастырылды. Халықаралық әйелдер күні қарсаңында персоналды басқару департаментінің мамандары: Тоғжан Әкімова, Ақгүл Рысқұлова, Мейрамгүл Раева және Әйгерім Ыдырысова қиын жағдайға тап болған көпбалалы әйелдерді мерекемен құттықтап барды. Бұл отбасыларды біз Ақтөбе еріктілер қауымдастығының көмегімен таптық.
Динара есімді ақтөбелік әйелдің бес баласы бар. Қалалық сүт зауыты ауданында бір үйдің бұрышын жалдап отыр. Үлкен қыздары мектепте оқиды. Отағасының еңбекақысы пәтер ақысы мен тамаққа ғана жетеді. Әріптестеріміз апарған тәтті сыйлықтарды балалар қуана қабылдады.
Ал, жалғызбасты ана Олеся үш баласымен бұрынғы жатақхананың шағын бөлмесінде тұрып жатыр. Балалар тәттілер мен жемістерге риза болды. Ал, біз жақсылық жасауды жалғастырамыз.