“Ақтөбе” ӘКК” АҚ басқарма отырысы: еншілес компаниялар “ИАБК” және “ASECA” ЖШС басшыларының осы жылдың 8 айында атқарған жұмыстары жөніндегі баяндамалары тыңдалды.

Бірінші болып “Ақтөбе” индустриялық аймағы басқару компаниясының директоры Әлімжан Жалбаторов есеп берді. Оның айтуынша, бюджетке түсетін қаржылық жүктемені азайту мақсатында индустриялық аймақтың инфрақұрылымына инвестиция құю және индустриялық аймақты бірлесіп басқару мәселелері бойынша кәсіпкерлермен келіссөздер жүргізіліп жатыр.

«Біз функциялардың бір бөлігін сенімді басқаруға беру үшін сенімді серіктес іздеп жатырмыз. Ұсынысымызға қазір «MACHTECH» түрік компаниялар тобы қызығушылық білдіріп отыр. Бұл тазарту нысандарының құрылысымен айналысатын және Стамбұл қаласындағы индустриялық аймақтың инфрақұрылым нысандарын ұйымдастыру пайдалануға беру ісінде көпжылдық тәжірибесі бар ірі энергетикалық компания. Ынтымақтастық аясында біз автономды электрмен жабдықтау көздерін, айналымды сумен қамтамасыз ету жүйесін, сонымен бірге отандық және түрік тауар өндірушілерге кейін бере алатын дайын өндірістік алаңдар сала аламыз», деді Әлімжан Нұрлыбайұлы.

Дайын өнімді сатып алатын әлеуетті тұтынушыны іздеуде резидент-компанияларға қолдау білдіру мәселесіне баса назар аударылып жатыр. Өңірлік кәсіпкерлер палатасымен жасалған меморандум шеңберінде резиденттерге индустриялық сертификат алу кезінде көмек беріледі. Бұл оларға отандық тауар өндірушілердің бірыңғай реестріне енуге мүмкіндік береді.

«ASECA» ЖШС директорының орынбасары Қанат Хасеновтың айтуынша, компания көлік-логистикалық қызметтер көрсетеді, сонымен бірге 41-бекет ауданындағы қоймаларды жалға береді. Қазір ет экспорты бойынша келіссөздер жүріп жатыр. Бұдан бөлек, ағаш көшеттері өсірілетін тәлімбақ жобасын жүзеге асыру мәселесі қарастырылуда.

«Біз қыруар жұмыс атқардық. Енді жобалық басқару тәсіліне көшіп жатқанымыз – үлкен қадам. 2021 жылдың 1 қаңтарына дейін біз трансформацияны толық аяқтап, сервистік модельге көшуіміз керек. Бұған әлеуетіміз жетеді», деп “Ақтөбе” ӘКК” АҚ басқарма төрағасы Ермек Имантаев кездесуді қорытындылады.