Басқарма төрағасының орынбасарлары есеп берді
«Ақтөбе» әлеуметтік-кәсіпкерлік корпорациясы басқарма төрағасының орынбасарлары 2020 жылы атқарылған жұмыстардың есебін беріп, биылғы жылдың жоспарымен бөлісті. Инвестициялық салаға жетекшілік ететін Әнуар Асыловтың айтуынша, өткен жылдың қорытындысы бойынша корпорацияның инвестициялық қоржынында жалпы құны 178,6 млрд теңге болатын 75 жоба бар. Ірі бизнес иелері ауыл шаруашылығы кешені, білім беру, фармацевтика саласында жобаларын жүргізуді бастады. Шағын және орта бизнес өкілдерінен сауда және қызмет көрсету, жол бойындағы сервис саласында бизнес-жобалар түсті.
⠀
Бұдан бөлек, «Ақтөбе» индустриялық аймағына инвестор тарту және жобаларды сүйемелдеу, «Arman qala» көше саудасын дамыту бағдарламасын жүзеге асыру, сонымен қатар, екінші деңгейлі банктерден қаржы және мемлекеттік қолдау алу үшін бизнес-жоба дайындау жұмыстары атқарылды.
⠀
Айта кету керек, осы жылдан бастап корпорация әлеуметтік бағыттағы сервистік компанияға ауысуды жоспарлап отыр. Осыған орай, басқарма төрағасы Ермек Имантаев ұжымға жаңа міндеттер жүктеді.