Ақтөбеде жергілікті тауар өндірушілерінің көрмесі өтті. 40 шақты компания өз өнімін қалың көпшілікке таныстырды. Қонақтар «ECOJOY-дың» мармеладынан, “АсАмирдің” ет өнімдерінен және “Той Дастархан” кондитерлік дүкенінің тәтті нанынан дәм татты. Кәсіпкерлер кездесуіне облыс әкімі Оңдасын Оразалин, Орынбор облысындағы кәсіпкерлердің құқығын қорғау жөніндегі уәкілі Виктор Коршунов, өңірлік кәсіпкерлер кеңесінің мүшелері, «Ақтөбе» ӘКК, ірі кәсіпорындар мен қаржы институттарының жетекшілері қатысты.

«Ірі өнеркәсіп орындарын табысты дамытудан өзге, біздің өңірде шағын және орта бизнесті дамыту мәселесі өзекті болып отыр. Мұндай кездесулер ең алдымен, жергілікті тауар өндірушілер мен ірі тұтынушылар үшін пайдалы, олар өзара тікелей байланыс орнату мүмкіндігіне ие болады»,-деді аймақ басшысы.

«Атамекен» ӨКП директоры Анар Даржанова атқарылған жұмыстарға тоқталды. Облыста 59,1 мың шағын және орта кәсіпкерлік субъектісі бар.

«2019 жылы «БЖК-2020» бағдарламасы бойынша бизнеске қаржылай емес қолдау көрсету аясында өңірлік кәсіпкерлер Палатасының сүйемелдеуімен 256 жаңа шағын және орта бизнес субъектісі ашылды және жалпы сомасы 870 миллион 364 мың теңгеге 72 жоба жүзеге асырылды. «Бизнес Кеңесші» жобасы бойынша 1 мың 69 адам оқып шықса, олардың 344-і «Atameken Academy» арқылы онлайн оқытылды, «Бизнес Өсу» жобасына 115 адам қатысты»,- деді Анар Даржанова.

«Қарапайым заттар экономикасы» бағдарламасы бойынша Ақтөбе облысында жалпы құны 12,5 млрд теңгенің 92 жобасы мақұлданды. Оның 85-і былтырғы жоба. Бұдан бөлек, 12,9 млрд теңгенің 32 жобасы бойынша құжат дайындалып жатыр. Анар Даржанованың айтуынша, жоспарланған және несиелендірілген жобалардың қатарында Ақтөбеде бұрын-соңды болмаған өндіріс орындары бар. Бұл өңірде шығарылатын өнімдер номенклатурасын кеңейтуге мүмкіндік береді. Атап айтсақ, Ақтөбе облысы бойынша аймақ үшін маңызды саналатын балмұздақ, гофракартон, құс еті және дәрілік препараттар өндірісі, таңқурай өсіру және одан тосап жасау, нан және нан өнімдері өндірісі, бетоннан жасалған құрылыс материалдары, хирургиялық және ортопедиялық құралдар өндірісі секілді бірнеше кәсіп түрлері қосылды.

Ақтөбеде сапалы тауарлар шығарылса да, кейбір мемлекеттік органдар дәл сол өнімді әлі сырттан сатып алады. Талдаулар осындай нәтиже көрсетті. Мемлекеттік сатып алулар кезінде отандық және жергілікті қамтудың әлеуеті толық пайдаланылмай отыр. Кәсіпкерлермен кездесуі кезінде аймақ басшысы осылай деді.

«Осы жылы жергілікті қамтудың үлесін орташа есеппен кемінде 50%-ға, тамақ және жеңіл өнеркәсіп өнімдері, құрылыс материалдары мен жиһаз секілді жергілікті тауарлар үлесін кемінде 90% -ға жеткізу керек»,-деп атап өтті Оңдасын Оразалин.

Облыс әкімі «Ақтөбе» индустриялық аймағынан жеңіл шарттармен жер учаскелерін беру, аймақта шығарылатын тауарды өткізу кезінде кәсіпкерлерге жан-жақты қолдау көрсетуге дайын екенін білдірді.