«Ақтөбе» ӘКК» АҚ басқарма төрағасының орынбасары Нұрлан Серікжан еншілес мекеме – «А-Полиграфия» ЖШС-інде болып, жыл бойы атқарылған жұмыспен танысты. 2019 жылдың шілде айында ЖШС директоры қызметіне Тимур Шакеров тағайындалған болатын. Осы уақыттың ішінде баспахана ғимаратында біраз шаруа тындырылды. Атап айтқанда, жылу құбырлары жөнделіп, жылу жүйесі болмаған бөлмелерге құбыр өткізілді, кәріз құбырлары алмастырылды, нысанның шатыры жөнделді. Бұдан бөлек, ғимараттың терезелері толық жаңартылды. Бейнебақылау камерасы қондырылды. Баспаханадағы баспа құралдары жөнделіп, іске қосылды. Бұған қоса, кітапты түптеу машинасы, екі жаңа принтер, желімдеу аппараты, ламинатор, т.б. баспаға қажет құралдар сатып алынды.

Өндірістік ғимаратта жалға берілетін 1500 шаршы метр бос аумақ бар. Қазір мұндағы бірнеше бөлмені өндірістік қолғап тігетін цех, медициналық қорғаныс киімін тігетін цех, жиһаз жасау цехы, антисептик өндірісі, т.б. жалға алып отыр. Мұнда барынша жағдай жасалған. Аумақ күзетіледі. Көлік тұрағы бар. Болашақта жұмысшыларға арналған асхана ашу жоспарланып отыр.  Мекеме басшысы өндірістік бөлмелерді жалға беруге дайын.