«Ақтөбе» әлеуметтік- кәсіпкерлік корпорациясы «Protecting business and investments» жобасын қолдайды

Кәсіпкерлер мен инвесторлардың қызметіне заңсыз араласатын сыбайлас жемқорлықты анықтауға, жолын кесуге бағытталған «Protecting business and investments» жобасы аясында бүгін «Ақтөбе» әлеуметтік- кәсіпкерлік корпорациясы кеңсесіне Сыбайлас жемқорлыққа қарсы іс-қимыл жанындағы республикалық арнайы мониторингтік топ келді.

ҚР Сыбайлас жемқорлыққа қарсы іс-қимыл агенттігі Ақтөбе облысы бойынша департаментінің басшысы Бауыржан Балғабеков бастаған делегация инвесторлар мен кәсіпкерлерге толық консалтингтік қызмет көрсететін фронт-кеңсенің қызметімен танысты.

Фронт-кеңсеге жолыққан кез келген инвесторға «бір терезе» қағидасы бойынша жан-жақты көмек көрсетіледі. Ол техникалық шарт алудан бастап жер учаскесін рәсімдеуге дейінгі барлық қызметтерді осы жерден алады. Бүгінгі таңда «Ақтөбе» ӘКК-ның жобалар портфелінде жалпы құны 178,6 млрд теңге болатын 75 жоба бар.

Мониторингтік топ мүшелері бұдан кейін «Ақтөбе» индустриялық аймаққа барды. Онда «Зерде – Керамика» ЖШС-і, «Поливест»ЖШС-і, «TalanTechnology» ЖШС-і өндіріс орындарымен танысты. Қазір индустриялық аймақта 7 кәсіпорын жұмыс істеп тұр. 6,2 млрд теңге инвестиция салынып, 340 тұрақты жұмыс орны ашылды.