Әлеуметтік-кәсіпкерлік корпорациялары ғылыми зерттеуге бағытталған, мықты жобалық-технологиялық базасы бар, инвестиция тарту мен экспортты қолдауды көздейтін, аймақтың нарық жағдайына оң әсер ете алатын толыққанды өңірлік институты ретінде қалыптасуы керек. Бұл туралы Қазақстандағы әлеуметтік-кәсіпкерлік корпорациялары басқарма төрағаларының Zoom-алаңындағы кездесуінде «Ақтөбе» әлеуметтік-кәсіпкерлік корпорациясының басқарма төрағасы Ермек Имантаев мәлімдеді. Оның айтуынша, қазір әлеуметтік-кәсіпкерлік корпорациялары қызметінің тұжырымдамасы әзірленіп жатыр. Құжат дайындалып жатқан шақта корпорацияның барлық проблемалық сұрақтары қарастырылып, шешімін табуы тиіс.

⠀

Ермек Имантаев ең алдымен, әлеуметтік-кәсіпкерлік корпорациялар қызметінің өкілеттілігін шектейтін қаулыны өзгертуді ұсынды. Соның ішінде, жер қорын пайдаланудың басым құқығын әлеуметтік-кәсіпкерлік корпорацияға беру керек. Себебі, қазір ӘКК-ы жер учаскесін беру құзыретіне ие болғанымен, оның механизмі нақтыланбаған. Бұдан бөлек, жер қойнауын пайдалану контракттарын алу құқығы ӘКК-на қайтарылса деген ұсыныс жасалды. «Бастысы – әлеуметтік-кәсіпкерлік корпорациясы ұғымының мәні әлі анық емес. Ол әлеуметтік кәсіпкерлік пе, әлде әлеуметтік акцияға қатысу ма – түсініксіз. Соны нақтылау керек», деді Ермек Имантаев. Ол өзге өңірлердегі әріптестерін өңірлік институттың дамуына оң ықпалын тигізетін ортақ әрі тиімді шешім қабылдауға шақырды.

⠀

Онлайн-кездесу ұйымдастырып, пікір алмасуға мүмкіндік берген «Алматы» әлеуметтік-кәсіпкерлік корпорациясындағы әріптестерімізге алғысымызды білдіреміз.