«Aqtobe Hub» өңірлік даму орталығы ​қамқоршылық кеңесінің отырысы кезінде облыс әкімі Оңдасын Оразалин осылай деді.

«Ақтөбе облысын жаңғырту және оны қазіргі жағдайға бейімдеу жобасына азаматтық қоғам, мемлекеттік сектор, шағын, орта және ірі бизнес, даму институттарының, сонымен қатар, президенттің жастар кадр резервінің ​өкілдері тартылды. Жыл басында ​ «Brainstorming» стратегиялық сессиясы өткізіліп, 100 өңірлік көшбасшы облыстың жүйелі мәселелері мен оларды шешу жолдарын ​талқылады. Бұл жоба сондай-ақ, білім сапасын арттыру, сұранысқа ие және білікті мамандарды даярлауды көздейді»,- деп атап өтті Оңдасын Оразалин.

Жаңғырту аясында «AqtobeExecutiveProgram» оқыту бағдарламасы іске қосылады. Бағдарлама көшбасшылардың құзыретіне сәйкес қазіргі заман талаптарын ескере отырып құрылады.

«Мұндай жоба Қазақстанның бірде-бір өңірінде жүзеге асырылмағанын атап өткім келеді. Ол өзекті проблемаларды шешуде билік, бизнес және азаматтық қоғам күштерін біріктіруге, өңірді дамытудың әлеуметтік жобаларымен қатар, инвестициялық жобаларын да әзірлеп, жүзеге асыруға мүмкіндік береді», – деп атап өткен өңір басшысы компания басшыларынан бірегей жобаны қолдауды сұрады.

«CSI Group» аға серіктесі Олжас Құдайбергенов «Aqtobe HUB» өңірлік даму орталығы корпоративтік қорының қағидалары жайында айтып берді.

«Жаңғырту кезінде бірнеше бағыттар бойынша жұмыстар жүргізілетін болады, атап айтқанда, экономикалық, инвестициялық әлеуетті анықтау жұмыстары терең зерттеліп, кадрлік резерв құру, әкімдіктің бизнеспен және қоғаммен қарым-қатынасын нығайту, кәсіпкерлік әлеуетті ынталандыру, өңірді цифрландыру шаралары қабылданбақ. Ақтөбе облысы қолда бар әлеуетті ескере отыра бес жылдың ішінде Қазақстан бойынша бесінші орынға шығуы тиіс және бұл ең азы. Бұл бірнеше жылға есептелген ұзақ мерзімді жұмыс»,- деді Олжас Құдайбергенов.

«Dastan» ЖШС президенті Асхат Айтжанов бизнес қоғамдастығы жобаны жүзеге асыру үшін күш салуға дайын екенін атап өтті. Бизнес өкілдері бірқатар ұсынысын айтты.

Отырыс соңында Олжас Құдайбергеновті «Aqtobe HUB» өңірлік даму орталығы корпоративтік қорының қамқоршылық кеңесі төрағасы етіп тағайындау туралы шешім қабылданды.