“Protecting Business and Investments” жобасы аясында 34 келісімге қол қойылды

Инвестициялық жобаларды жүзеге асыру барысында «Ақтөбе» әлеуметтік-кәсіпкерлік корпорациясы қандай қолдау көрсетеді? Бұл туралы «Antikor ortalygy» сервистік ғимаратында өткен жергілікті және шетелдік инвесторлармен кездесу кезінде корпорацияның басқарма төрағасының орынбасары Әнуар Асылов баяндады.

Кездесуге ҚР Сыбайлас жемқорлыққа қарсы іс-қимыл Агенттігінің Ақтөбе облысы бойынша департаменті басшысының м.а. Бауыржан Балғабеков, индустриялық-инновациялық даму басқармасы басшысының м.а. Әміржан Оразғалиев, «Kazakh Invest» ҰК» АҚ аймақтық өкілдігінің директоры Бекбол Сағын, «Ақтөбе» ӘКК-нің инвестицияларды дамыту департаментінің басшысы Әнуар Сабыр, сондай-ақ жергілікті және шетелдік инвесторлар мен кәсіпкерлер қатысты.

2018-жылдан бастап елімізде Қазақстан Республикасы Сыбайлас жемқорлыққа қарсы іс-қимыл агенттігінің бастамасымен “Protecting Business and Investments” жобасы жұмыс істеп жатыр. Осы уақыт ішінде инвестициялық жобаларды сыбайлас жемқорлыққа қарсы сүйемелдеу жөнінде жалпы сомасы 4,1 трл. теңгені құрайтын 34 келісімге қол қойылды. Заңсыз қосымша салық есептеу, жер қатынастары мен мемлекеттік сатып алу салаларындағы әкімшілік кедергілер секілді мәселелердің шешілуі жобаның тиімділігін дәлелдеп отыр.