«Arman qala» жобасы арқылы ашылған көше павильондарына мониторинг жүргізілді
«Ақтөбе» әлеуметтік-кәсіпкерлік корпорациясы басқарма төрағасының орынбасарлары Әнуар Асылов пен Нұрлан Серікжан, жобаларды талдау және сүйемелдеу департаментінің директоры Үмітбек Ермағамбетов «Arman qala» әлеуметтік бағдарламасы аясында ашылған көше павильондарын аралап шықты. Мониторинг жүргізудегі мақсат – көше павильондарының нысаналы пайдаланылуын, санитарлық талаптардың сақталуын, айналасының тазалығы мен қала сәулетіне сәйкес болуын қадағалау.
⠀
Мониторингтік топ алдымен «Нұр Ақтөбе» ауданындағы сауда нүктелерінде болды. Соңғы жарты жылда бұл ауданда он шақты көше павильоны ашылды. Бәрі де талапқа сай жұмыс істеп тұр. Тек бір павильон иесіне көкөніс жәшіктерін жоғары орналастыру қажеттігі ескертілді. Кәсіпкерлердің ұсыныс-пікірлері тыңдалды. Қаладағы 101 атқыштар бригадасы көшесінде қатарласа орналасқан үш павильон мониторингтік топтың көңілінен шықты.
⠀
Батыс Қазақстан жәрмеңкесі базары маңында автокөлік бөлшектерін сататын шағын павильонды орнату жұмысы аяқталды. Нысанға электр желісін өткізу мәселесі шешілмей тұр. Бұл сұрақ назарға алынды. Кәсіпкерге мұны шешудің жолдары қарастырылатыны хабарланды. Көше павильондарының нысаналы пайдаланылуын қадағалау шарасы әлі де жалғасады. Арнайы топ апта сайын мониторингке шығуды жоспарлап отыр.