Астаналық мейман инвесторларға консалтингтік қызмет көрсететін фронт-кеңсенің қызметімен және корпорацияның жаңа жобалармен танысты. «Ақтөбе» ӘКК басқарма төрағасы Ермек Имантаев оған тұрақтандыру қоры, инвестициялық жобалар мен корпорацияның  қаржылық жағдайы туралы баяндады. «Bitrix» ақпараттық бағдарламасы негізінде енгізілген жобалық басқару жүйесі қалай жұмыс істейтінін көрсетті.

«Жобалық басқару жүйесінің артықшылықтарын аңғарып үлгердік. Күн сайын бізге 10-15 кәсіпкерден өтініш түседі. Біріне жер керек, екіншісі бизнес-жоспар жасап беруді сұрайды. Әр құжат жүйеге тіркеліп, бөлек жобаға айналады. 2-3 маман топ құрып, ол жобаны бизнес-процестің барлық кезеңінен өткенше сүйемелдейді. Бәрі ашық жүргізіледі. Қазір жобалық басқаруды аймақтық деңгейде жүргізу мүмкіндігі қарастырылып жатыр. Мысалы, облыс әкімі тапсырма қойса, оны орындау үшін жобалық топ құрылып, шынайы нәтижеге қол жеткізу үшін жұмыс істейді», — деді «Ақтөбе» ӘКК басқарма төрағасы Ермек Имантаев.   

Жайсаң Ахметов жобалық басқарудың  бұл тәсілін  уақытылы қолға алынған ерекше жүйе деп атады. Ол сондай-ақ, Ермек Жетпісбайұлының тиімді басқару дағдысы корпорация жұмысын аз уақыттың ішінде тиісті деңгейге көтергенін атап өтті.

Айта кетейік, «Ақтөбе» ӘКК келесі жылдан бастап толығымен басқарудың сервистік моделіне көшіп, облыс экономикасына инвестиция тартатын өңірлік агенттікке айналады.