Өңір басшысы фронт-кеңсенің жұмысымен танысты

Облыс әкімі Оңдасын Оразалин «Ақтөбе» әлеуметтік-кәсіпкерлік корпорациясы» АҚ-ның Маресьев көшесі, 103 А мекен-жайында орналасқан жаңа кеңсесінде болды. Өңір басшысы инвесторлар мен кәсіпкерлерге толық консалтингтік қызмет көрсететін фронт-кеңсенің жұмысымен және корпорацияда жүзеге асырылып жатқан жаңа жобалармен танысты.

«Ақтөбе» ӘКК» АҚ басқарма төрағасы Ермек Имантаев әкімді корпорацияның дамудың алдағы 5 жылдық стартегиясына негізделген жаңа моделімен таныстырды. Мәселен, Ақтөбе өңірінің трансформациясы аясында «Ақтөбе» әлеуметтік-кәсіпкерлік корпорациясы базасында жобалық басқару жүйесі енгізілді. Бұл жобаларды басқару процесіне қатысушылардың бәріне – жобаға жетекшілік ететін менеджерге, жобаның аяқталуын күтіп отырған клиентке, сонымен бірге, жобаның жүзеге асырылуына үлесін қосқан командаға ыңғайлы жүйе.

«Ақтөбе» ӘКК» АҚАқтөбе облысының өсу нүктелерінде инвестиция тарту арқылы экономикалық белсенділікті арттыратын және  бәсекеге қабілетті тұрлаулы бизнес-құрылымдарды қалыптастыруды жеделдететін өңірлік даму институты саналады.    Корпорацияда инвесторларды тарту мен сүйемелдеудің кешенді жұмыстары жүргізіліп жатыр.  Бүгінгі таңда жобалар портфелінде жалпы құны 124,4 млрд теңге болатын 88 жоба  бар.

Фронт-кеңседе әлеуетті инвесторлар мен кәсіпкерлерге мемлекеттік қолдау шараларын пайдалану жөнінде, соның ішінде «Бизнестің жол картасы – 2025», «Қарапайым заттар экономикасы» және басқа да мемлекеттік бағдарламалар арқылы қаржыландыру құралдары туралы жан-жақты кеңес беріледі, бизнес-жоспар дайындау, қаржылық сараптама жасау секілді бірқатар консалтингтік қызметтер көрсетіледі.

Бүгінгі таңда «Ақтөбе» ӘКК бірқатар жобаларды жүзеге асырып жатыр. Олардың қатарында: «Ақтөбе» индустриялық аймағы, «ARMAN QALA» көше саудасын дамытуға арналған әлеуметтік жобасы, жол бойындағы қызметті дамыту жобасы бар.

«Ақтөбе» индустриялық аймағы 2015-жылдың желтоқсанында құрылды. Бүгінге дейін 28 компания индустриялық аймақтың резиденті атанып отыр. Инвестиция сомасы – 38 млрд теңге. Бұл компанияларда 1200 жаңа жұмыс орны құрылады. Қазір индустриялық аймақта 7 кәсіпорын жұмыс істеп тұр. 6,2 млрд теңге инвестиция салынып, 340 тұрақты жұмыс орны ашылды. 2020 жылы жалпы сомасы 21,8 млрд теңге болатын 5 өндіріс орны іске қосылады деп жоспарланып отыр. 315 жаңа жұмыс орны пайда болады.

«Жол бойындағы қызмет» жобасы аясында «Ақтөбе» ӘКК-ы жалпы құны 1,5 млрд теңге болатын 10 жобаны сүйемелдеп жатыр. 80 жұмыс орны құрылады. Сонымен бірге, «Gas Energy» жанар-жағар май құю бекеттері желісін дамыту жобасы қарастырылып жатыр. Бұл компания еліміздің төрт ірі қаласы: Нұр-Сұлтан, Алматы, Шымкент пен Қарағандыда 24 бекетін ашқан. Ақтөбе облысында осындай 4 кешен салу жоспарланып отыр. Инвестиция көлемі – 2,1 млрд теңге. Қазір бұл жобаның қаржылық үлгісі жасалып жатыр.

«ARMAN QALA» әлеуметтік жобасын жүзеге асыру аясында қалалық әкімдіктен 83 жер учаскесі бөлінген. 57 учаскеде көше павильоны орнатылды. Бұл – фаст-фуд сату нүктесі, көкөніс дүкендері, ет және сүт өнімдерін сату орындары, кофехана, гүл салондары және т.б. 8 жер учаскесі әлеуметтік әлсіз тобына: көп балалы, жалғызбасты аналарға, мүгедек бала асырап отырған отбасыларға жеңілдікпен берілді. Осы бағдарламаның арқасында 114 жұмыс орны пайда болды.