Облыс әкімі Оңдасын Оразалин бүгін “Ақтөбе” индустриялық аймағын аралады. Аймақ басшысына жалпы құны 16,6 млрд теңге болатын 10 жаңа инвестициялық жоба таныстырылды. Жобалардың бірі – жүк тиеу, түсіру, тасымалдау және уақытша сақтау қызметін көрсететін «PRODUCTION & LOGISTIC PLATFORM» (APL Platform) логистикалық кешені бар индустриялық парк. Жобаны жүзеге асыру үшін жұмыс тобы құрылды, жобалық-сметалық құжаттары және қаржылық-экономикалық негіздемесі әзірленіп жатыр.

Әкім монтаждау жұмыстары жүріп жатқан «Aktobe Smart Tech» компаниясының деректерді өңдеу орталығында болды. Орталық 5 петабайтқа дейінгі деректі сақтайды. Жоба құны – 10,8 млрд теңге. Бұдан бөлек, өңір басшысы «LucrumStar» ЖШС-нің қағаз өнімдері зауытының құрылыс алаңына барды. Компания қағаз қалдықтарын қайта өңдеп, дайын өнім шығармақ. Жобаға 300 млн теңге инвестиция салынып жатыр. Цехтың жылдық қуаты – 23 млн дана дәретхана қағазы, 3 млн қағаз сүлгі, 7,5 млн қорап асхана майлығы.

Бүгінде индустриялық аймақта 25 резидент-компания бар. Индустриялық аймақтан жер алудың басты артықшылығы – инфрақұрылым нысандары дайын және энергия ресурстарының бағасы төмен. Биыл жыл соңына дейін 5 кәсіпорын ашу жоспарланып отыр. Инвестицияның жалпы сомасы – 21, 8 млрд. тенге. Қосымша 315 жұмыс орны ашылады.  Осылайша, жыл соңына дейін индустриялық аймақта кем дегенде 1000 адам еңбек ететін болады.

«Облыста жүзеге асырылатын әрбір жобаның орны ерекше. Өңірдің әлеуметтік-экономикалық дамуы, тұрғындардың тұрақты жұмыспен қамтылуы кәсіпорындардың іске қосылуына тікелей байланысты. Біз өз тарапымыздан қолдау көрсетуге әзірміз, дегенмен жұмысты жандандырып, жобаларды уақытында жүзеге асыру өздеріңе байланысты»,-деп атап өтті Оңдасын Оразалин. Облыс әкімі «Ақтөбе ӘКК» АҚ-ның басқарма төрағасы Ермек Имантаевқа инвестициялық жобалар санын арттырып, жоспардағы кәсіпорындарды ыждағаттап іске қосуды тапсырды.