Қыркүйектің 20-да облыстық Сыбайлас жемқорлыққа қарсы күрес қызметі мен «Атамекен» ӨКП бірлесе отырып, кәсіпкерлермен кездесу өткізді. Оның барысында кәсіпкерлік субъектілеріне «Ақтөбе» ӘКК» жұмысындағы жемқорлық қауіп-қатерлерді сыртқы талдау нәтижелері хабарланды.
Талдау қорытындыларына сәйкес, ӘКК қызметінің басым бағыттары бойынша жылдық шығынға әкеліп соқтыратын көптеген жемқорлық қауіп-қатерлері бар екендігі анықталған. Олар негізінен бюджет қаржысының жұмсалуы мен Қоғам жұмысының ашықтығына қатысты мәселелер. Сыбайлас жемқорлыққа қарсы қызметтің Превенция басқармасы басшысының орынбасары Баянбек Шуиншбаев оларды жою бойынша жалпы саны 26 ұсыныс жасады.
Сонымен қатар, кәсіпкерлер ӘКК басшылығына жер телімдерін алу жөнінде сұрақтар қойып, корпорацияның еншілес мекемелеріне қатысты шағымдарын білдірді.
ӘКК өкілдері жиналғандарды аталған мәселелер бойынша жүргізіліп жатқан жұмыстардың барысымен таныстырып, аталған ұсыныстардың жартысынан астамы жүзеге асырылғанын, қалғаны орындалу үстінде екенін айтты.
Шараны қорытындылай келе, Антикор өкілдері кәсіпкерлікті заңсыз араласудан қорғау жөніндегі қосымша шараларға түсініктемелер берді. Агенттік қызметкерлері мен «Атамекен» ҰКП өкілдерінен тұратын, кәсіпкерлердің арыз-шағымдарын алқалы түрде қарайтын арнайы жұмыс тобының жұмысы туралы Палата басшысының орынбасары Руслан Куйшинов айтып берді.