Италиялық кәсіпкерлер индустриалды аймаққа қызығушылық танытты

Италияның Copron және BE-ST компанияларының өкілдері қыркүйектің 19 күні Ақтөбеге арнайы келіп, индустриалды аймақтың жұмысымен танысты. Оның аумағында орналасқан заманауи «Зерде Керамика» зауыты кәсіпкерлердің ерекше қызығушылығын туғызды. Жергілікті шикізаттан шығарылатын сапалы керамогранит италиялық жабдықтың көмегімен өндірілуде. Импорт алмастыру мақсатында қолға алынған жоба сәтті жүзеге асып, бүгінде керамикалық тақтайшалардың 20-дан астам түрі шығарылуда.
Copron компаниясы өз тарапынан логистикалық шешімдер әзірлеуге, заманауи жабдықтар жеткізуге, өндірістік алаңдар, қоймалар және басқа да нысандар салуға маманданатынын жеткізіп, осы бағытта әріптестік орнатуға қызығушылық білдірді. Компания өкілі Стефано Бельтремоның айтуынша, зауытпен тиімді қарым-қатынас орнату үшін барлық алғышарттар бар.

Ал BE-ST компаниясы электронды құрылғылар әзірлеумен және олардың консалтингімен шұғылданады. Оның өкілі Никола Крепальдидің сөзінше, олар өнімді жобалау, дайындау және индустриалдандырудың барлық өндірістік үдерісін басқара алатын мүмкіндікке ие.

Содан соң меймандар индустриалды аймақта орналасқан тағы бір өндіріс орны – полиэтилен өнімдерін шығаратын «Поливест» ЖШС-нің жұмысымен танысты. Еліміздің батыс аймағындағы ірі өндіруші қатарына жататын кәсіпорын да италиялықтар тарапынан қызығушылық туғызды. Мұнда шығарылатын сан-алуан полиэтилен өнімдерінің ерекшелігі – оның құрамында қоқысты бір жыл ішінде ыдыратып жіберетін биоқосымшаның болуы. Компания өкілі Никола Крепальди оның жұмысын жетілдіре түсуге атсалысу мүмкіндігі мол екенін айтты.

Кездесу «Ақтөбе» әлеуметтік-кәсіпкерлік корпорациясы» АҚ-ның ғимаратында жалғасын тапты. Басқарма төрағасының міндетін атқарушы Ермек Құсайынұлы Беделбеков қонақтарды Қоғам жұмысымен таныстырып өтті. Олар өз кезегінде бірқатар елдерде сәтті жүзеге асырылған жобаларымен таныстырып, қажет болған жағдайда өз өнімдері мен қызметтерін Ақтөбе өңірінің өзіндік ерекшеліктеріне бейімдеуге дайын екендіктерін жеткізді. Кездесу соңында тараптар өзара тиімді әріптестікке дайындығының дәлелі ретінде Меморандумға қол қойды.