Хромтауда «Халық қатысатын бюджет» жобасы басталғалы жатыр

Бұл мақсатқа 50 млн теңге жұмсалмақ, деп хабарлайды Kapital.kz​ сайты.

Жоба талаптарына сәйкес, Хромтау қаласының тұрғындары бюджеттік емес қаржыға жүзеге асырылатын жобаларды өздері таңдайды. Халық, әкімдік пен қала құраушы кәсіпорын – Дөң тау-кен байыту комбинаты қоғамдық инфрақұрылым нысандарын қалай құрып, дамытуды бірігіп шешетін болады. Қала тұрғындары идея ұсынады, нысандардың сырт келбеті мен қызметін жобалайды, бұдан кейін ең үздік жобаға дауыс береді. Онлайн дауыс берудің қорытындысы бойынша жеңіске жеткен жобаны компания қаржыландырып, 2021 жылы әкімдік жүзеге асырады. 50 миллион теңге қаржыны ERG компаниясы бөледі.

​”Жобалар 1 шілдеден бастап арнайы порталда қабылданады. Ұсынысты тек Хромтау моноқаласының тұрғындары ғана жібере алады. Құны 5 млн теңгеден аспайтын жобалар ғана қарастырылады. Жобаларды арнайы сессияларда жергілікті халық әзірлейді. Ал,  2020 жылдың қыркүйегінде дауыс беру өтеді. 2021 жылы қандай жобалар қаржыландырылатыны сол кезде белгілі болады. Егер жобалардың ішінде байқау талаптарына сәйкес келмейтіні болса, жоба иесімен байланысып, кеңесімізді береміз. Сарапшылар кеңесінің талқысынан өткен барлық жобалар дауыс беруге жіберіледі”, – деді жобалар орталығының өкілі, “Шағын және орта кәсіпкерлікті дамыту агенттігі” ҚҚ төрағасы Абай Мырхин.

Айта кетейік, Қазақстанда «Халық қатысатын бюджет» жобасы 2019 жылдан бері Алматыда және Нұрсұлтан қаласының “Сарыарқа” ауданында жүзеге асырылып келеді. Ал, шағын қалада алғаш рет қолға алынғалы отыр. «Халық қатысатын бюджет» жобасы келесі тәртіп бойынша жүзеге асырылады: веб-порталда идеялар конкурсы өткізіліп, нақты сол ауданның барлық тұрғыны аудандық әкімдікке өздері маңызды деп тапқан жобаны жүзеге асыруды ұсынады.

Келіп түскен өтінімдер талданып, кейін ол бойынша «1 тұрғын – 1 дауыс» тәртібімен ашық дауыс беру жүргізіледі. Дауыс берудің нәтижесі бойынша сарапшылық қауымдастық жобаларды қаржыландыру кезегін белгілейді. Аудандық әкімдіктің сайтында тұрғындардың қандай жобаға қалай дауыс бергенін көруге болады. Жобалардың авторы, статусы, суреті жарияланады. Жоба авторы тұрғын үй ПИК-і немесе тұрғын бола алады.