Ақтөбе облысында «Бизнестің жол картасы» бағдарламасы аясындағы жобаларды жүзеге асыру үшін 5 млрд теңге бөлінді

Бұл туралы өңірлік коммуникацилар қызметінде өткен брифингте облыстық кәсіпкерлік басқармасының басшысы Нұрхан Тілеумұратов хабарлады.  Спикер “Бизнестің жол картасы – 2025” мемлекеттік бағдарламасы қалай жүзеге асырылып жатқанын айтып берді. 

«БЖК-2025» бағдарламасына биыл 5 млрд теңге бағытталды. Бұл 2019 жылмен салыстырғанда екі есеп көп. Біз биыл кем дегенде 350 бизнес-жобаға қаржылық қолдау көрсетуді  жоспарлап отырмыз. Оның 210-ы мақұлданды. Өсім – 24%. Біздің облыс бағдарламаны жүзеге асыру белсенділігі жөнінен өңірлер арасында екінші орында тұр. Жобалардың басым бөлігі Ақтөбе қаласы, Мұғалжар және Хромтау аудандарында жүзеге асырылып жатыр», – деді спикер.  

Нұрхан Тілеумұратов осы бағдарлама аясында несие мөлшерлемесін субсидиялау, кепілдік беру, инфрақұрылым нысандарын жүргізу секілді бірнеше жоба жүзеге асырылып жатқанын атап өтті. Жыл басынан бері 311,7 млн теңгеге 15 кәсіпкерлік нысанына коммуникациялық желілер тартылған. Елді мекендерде салалық шектеулерге қарамастан бизнестің барлық түріне инфрақұрылым объектілері жүргізіледі. Ал, Ақтөбе қаласында тек экономиканың басым бағыттары мен өңдеуші өнеркәсіпке қатысты жобаларға ғана коммуникациялық желілерді тарту жайы қарастырылған. Мәселен, бюджеттік қаражат есебінен Батыс-2 шағын ауданында салынып жатқан 600 орындық мектептің, «Фарм Актобе» ЖШС, Байғанин ауданындағы газ өңдеу зауытына, кемпингтерге, фермерлік шаруашылықтарға, сүтті-тауарлы фермаларға, жылыжайларға, демалыс базаларына және бизнестің т.б. нысандарына инженерлік желілер тартылған.  

« Гранттар жөнінде айтар болсам, биыл қаржыландыру 3,5 есеге артып, 140 млн теңге болды. Құжат қабылдау 21-тамызда аяқталады. 2020 жылдан бастап гранттың минимал көлемі 2 млн теңге деп бекітілді. Максимал шегі – 5 млн теңге. Бұл әлдеқайда сапалы жобаларды қолдауға мүмкіндік береді. Бұдан бөлек, грант алу ережесінде өзгерістер бар. Бұдан былай, басымды бағыттарға мән беріледі. Сол себепті, монша, шаштараз, қоғамдық тамақтану орны немесе сауда салалары бойынша жобалар қабылданбайды», – деді облыстық кәсіпкерлік басқармасының басшысы.